DAI LA KITI CHA ZANZIBAR UN LAFICHUA MAKUBWA!

 Na:waandishi wetu.

.       Lahusishwa na uchomwaji makanisa

·       Uamsho walibebeshwa mzigo usio wao

·       Dai la vitambulisho bandarini Dar laleta hofu mpya

“Kama hoja ya kudai kiti cha Zanzibar katika Umoja wa mataifa ingetolewa na katibu kata au mjumbe wa nyumba kumi, ingekuwa huru na kutazama yenyewe kama ilivyo, lakini kwa kutolewa hadharani na Makamu wa Kwanza wa Rais wa Zanzibar, Maalim Seif Sharif Hamad, hoja hiyo inafichua mambo makubwa na kujenga dhana kuwa, hata kundi la Uamsho wa Mihadhara ya Kiislamu la Zanzibar, lililoibua vugu vugu hilo na kuishia kwenye uchomwaji moto wa makanisa lilibeba ujumbe usio wao.”

Hayo ni maelezo ya mmoja wa wachangiaji wa mjadala mzito ulioibuliwa wiki iliyopitan na Maalim Seif, ambaye ni Katibu Mkuu wa Chama Cha Wananchi (CUF), chenye kuunda Serikali Mseto na CCM huko Zanzibar.

Katika kauli yake hiyo,  Maalim Seif,  alisema kuna haja kwa Zanzibar kurejeshewa kiti chake katika Umoja wa Mataifa (UN).

Alitoa kauli hiyo alipokuwa akizungumza na Viongozi wa Wilaya na Majimbo wa Chama cha Wananchi (CUF), katika ukumbi wa Benjamin Mkapa, kisiwani Pemba wiki iliyopita.

Kiongozi huyo wa pili katika Serikali ya mseto alisema kuwa, Zanzibar kabla ya Muungano, ilikuwa nchi huru iliyokuwa na kiti chake UN, hivyo ni wakati sasa kurejeshewa mamlaka kamili, ili iweze kutambulika tena kimataifa.

Maalim Seif, alisema; hoja kubwa ambayo Wazanzibari wanatakiwa kujadili katika mchakato wa maoni ya Katiba mpya ni muundo na mfumo wa Muungano.

“Zanzibar tunayo Katiba yetu ya mwaka 1984, ambayo imejitosheleza kwa mambo yetu ya Zanzibar, lakini suala kubwa kwenye mabadiliko hayo kwetu sisi litakuwa ni la Muungano na hili haliwezi kuepukwa,” alisema Maalim Seif.

Maalim Seif, aliwataka wananchi kuangalia maslahi ya nchi yao, kwanza katika mchakato wa kukusanya maoni ya mabadiliko ya katiba na kuacha tabia ya kutetea misimamo ya vyama badala ya maslahi ya nchi na wananchi wake.

Kisha akaongeza: “Katiba ya nchi ni mali ya wananchi, siyo ya chama chochote, lakini najua kila chama kina katiba yake na hiyo ndiyo itabakia kuwa katiba na mwongozo wa chama husika, kwa hivyo! ndugu zangu naomba tulifahamu hili na tuangalie maslahi ya nchi yetu kwanza,” alisema Maalim na kupigiwa makofi na wanachama.

“Mimi najua wapo wanaotaka serikali moja, wengine mbili, tatu, nne, na muungano wa mkataba, lakini wengine wanataka waachiwe wapumue…Yote hayo ni maoni na kila mtu ana haki ya kutoa maoni yake bila ya kulazimishwa, kwa hivyo wakati wenu ukifika nendeni mkatoe maoni hayo kwa uwazi,” alisema Maalim Seif.

“Wakati wenu ukifika nendeni mkatoe maoni yenu kwa uwazi bila ya hofu hiyo ni haki yenu ya kikatiba,” aliongeza.

Kauli ya Maalim Seif inapingana na ile iliyotolewa na Mwenyekiti wa Tume ya kukusanya maoni ya katiba, Jaji Joseph Sinde Warioba, ambaye alizitaka taasisi, vyama na makundi mengine kutowapandikizia wananchi maoni badala yake wawaache watoe maoni yao.

Kwa muda mrefu sasa kumekuwa na madai kadhaa mitaani kuwa, Chama cha Wananchi CUF, kinatumia dhana ya udini kujieneza. Ingawa chenyewe kimekuwa kikikana madai hayo lakini bado dhana hiyo haijafutika katika mawazo ya watu.

Lakini jambo linalotia shaka ni uwiano wa wazi wa hoja  baina  Maalim Seifu na zile za kundi la uamsho, ambalo mapema mwaka huu, liliibua maandamano na ghasia  zilizpeleka kuchomwa moto baadhi ya makanisa, likiwepo la Katoliki na Tanzania Assemblies of God.

Wanauamsho katika ujumbe wao wa maelezo na mabango walidai kuwa Zanzibar, imekuwa ikinyonywa, hivyo inahitaji kuwa huru itambulike kimataifa.

Aidha kundi hilo lilipinga zoezi la kukusanywa kwa maoni ya kuandikwa kwa katiba mpya mpaka kwanza Wazanzibar wapewe nafasi ya kutoa maoni yao kuhusu aina ya Muunganao wanaoutaka. Dai hili linafanana sana na hoja ya Maalim Seif.

Baadhi ya waliojadili suala hilo kwenye mitandao ya kijamii, wiki hii, wametofautiana na Wazanzibar wengi wakimuunga mkono kiongozi huyo wa Serikali ya mseto, lakini Wabara wengi wakipingana naye.

Miongoni mwa waliotoa maoni yao ni, Bw. Haji Ismael wa Pemba, ambaye aliliambia jibu la Maisha kuwa, hoja aliyonayo Maalim Seif, ni ya Wapemba wote na kwa kweli wangependa kuachana na Muungano, ili wampendeze mola wao.

“Hoja hii nakuambia wala sio ya Uamsho, wale ni mashujaa walioibeba lakini hii ni hoja ya Wazanzibari wote. Kwa kweli kuna tofauti kubwa sana baina ya Wabara na Wazanzibar, Wabara wengi wanaishi maisha ya mseto, wakati Wazanzibar wanaishi maisha ya ki-Islamu. Mwezi mtukufu, Zanzibar huwezi kuona uchafu unafanyika, lakini Bara sio hivyo wanaweza kukaanga nguruwe uwanjani wakala na kujilamba, hivyo ni bora muungano utazamwe upya ili utoe nafsi kwa Waislamu kutekeleza nguzo zao zote za uislamu.” alisema Bw. Haji.

Ingawa Maalim Seif, hakufafanua kauli yake ya Zanzibar kuwa na kiti chake katika UN, lakini anamaanisha kwamba Zanzibar inapaswa kuwa na mamlaka yake kamili.

Kwa maana hiyo ikiwa Zanzibar itarejeshewa kiti chake katika UN, hapatakuwepo na Muungano tena kwa kuwa itakuwa ni nchi kamili ambayo inatambuliwa na UN na Jumuiya ya kimataifa kwa ujumla.

Tangu Tume ya kukusanya maoni ya Katiba mpya kuanza kazi hiyo, kumeibuka kikundi kinachofanya kampeni misikitini (Uamsho), kutaka Zanzibar kujitenga katika Muungano huku wengine wakitetea kuwepo kwa Muungano wa mkataba.

Vile vile, baadhi ya Wazanzibari wakiwemo mawaziri na makada wa Chama Cha Mapinduzi (CCM) wamesema kuwa, kuna haja ya kuwa na Muungano wa mkataba kwa lengo la kumaliza kero zinazolalamikiwa.

Miongoni mwa makada wa CCM waliotaka Muungano wa mkataba ni Waziri asiye na Wizara Maalum, Mansour Yusuf Himid, na mmoja wa waasisi wa Mapinduzi ya Zanzibar, Ali Nassoro Moyo.

Hata hivyo, baadhi ya makada wamewashambulia na kuwatisha wanachama wa chama hicho wanaotoa maoni tofauti na sera ya CCM ambayo ni muundo na mfumo wa serikali mbili.

Makamu wa Pili wa Rais wa Zanzibar, Balozi Seif Ali Iddi, wiki iliyopita wakati akifungua Mkutano Mkuu wa Jimbo lake la Kitope, alisema; wanaopingana na sera ya CCM kuhusu muungano warejeshe kadi zao za uanachama, badala ya kusubiri kufukuzwa.

Naye Mbunge wa Uzini (CCM), Dk. Mohammed Seif Khatib, Alhamisi iliyopita akizungumza na waaandishi wa habari mjini Dodoma akiwa na wabunge zaidi ya 30 kutoka Zanzibar alieleza kushangazwa na wanachama wanaotoa maoni ya kuvunja Muungano.

Khatib ambaye ni Mwenyekiti wa wabunge wa CCM Zanzibar, alisema chama hicho kinapaswa kuwachukulia hatua kwa maelezo kuwa walipata nyadhifa zao kwa kutumia ilani ya CCM inayoeleza wazi kuwa sera yake ni ya Muungano wa serikali mbili.

 Hadi tunaenda mitamboni juhudi za kumpata msemaji wa CUF, kueleza ikiwa kuvunja muungano ndio msimamo wa chama hicho hazikufanikiwa lakini hata hivyo bado zinaendelea.

Wakati huo huo, utaratibu mpya wa safari za Zanzibar, kupitia boti katika bahari ya Hindi, wa kuwataka wasafiri kuonesha vitambulisho vyao kabla ya kukatiwa tiketi  umelalamikiwa na wasafiri wengi kuwa ni wa kustaajabisha na haukutangazwa.

Uchunguzi wa gazeti hili umebaini kuwa  huo ni utaratibu uliokuwepo huko nyuma ingawa ulikuwa haufuatiliwi hadi zilipotokea ajali mbili za majini na kuuaa watu wengi, ndipo mamlaka ya usafiri wa majini na nchi kavu SUMATRA walipotangaza amri ya kusimamiwa.

Baadhi ya wasafiri wameonesha wasi wasi wao kuwa, huenda kuna jambo nyuma ya pazia kwamba, kuwa wanaopanda boti kuja bara hawaulizwi vitambulisho, lakini wakirejea wanatakiwa kuwa navyo.